امثال وأقوال شعبية عند أهل الشام

أمثال وأقوال أهل الشام

يتميز أهل الشام عموماً بترديد بعض الأمثال الشعبية في شتى أمور حياتهم، والمثل الشعبي هو عبارة عن جملة مركبة تدل على حدوث الموقف ووصفه في الوقت الحالي، توارث الأجيال تلك الأمثال عن أجدادهم، حتى بقيت قائمة وحاضرة عند غالبية أهل الشام في وقتنا الحاضر.

أمثال شعبية عن المرأة عند أهل الشام

• غسلي وجهك ما بتعرفي مين بيبوسو، ونضفي بيتك ما بتعرفي مين بيدوسو.
• يا مآمنة بالرجال متل المي بالغربال.
• عم حاكيكي يا جارة اسمعي يا كنة.
• اللي بتاخد القرد على مالو، بيروح المال وبيضل القرد على حالو.
• على حظاتك يا حزينة سكرت المدينة.
• لولا علبة مكّي، كانت الحالة بتبكّي.
• الحلوة حلوة وهيي فايقة من النوم، والبشعة بشعة لو تحممت كل يوم.
• المونة بدها ركونة، ما بدها مرأة مجنونة.
• طبخة الشطاطة مفكرة بطاطا.
• الكلام الحلو بيطلع الحية من وكرا.
• من يوم يومك يا تينة مجعلكة.
• متل الحرباية بالوجه مراية وبالقفا صرماية.
• ما بيفضح الوزير، غير الكنة والأجير.
• بنت المعمرجي حلمها تعمر أوضة، وبنت الصايغ حلمها تشتري دهب عالموضة.
• البنت المنيحة خير من الصبي الفضيحة.
• الحلوة ما بيحوشها إلا اللي بيملك قروشها.
• حطو الحماية وإبليس بالكيس طلع الكيس عم يستغيث.
• الخنفسة شافت بنتا عالحيط قالتلا تقبريني متل اللولية بالخيط.
• الغزالة الشاطرة بتغزل على دنب كلب.

أمثال شعبية عن الرجال عند أهل الشام

• ألف كلمة جبان، ولا كلمة الله يرحمو.
• الديك الفصيح من البيضة بيصيح.
• الرجال غايبة والنسوان سايبة.
• اللي بيقلل عقلو بيتعبو رجليه.
• اللي بيتدخل بشي ما بيعنيه بيلاقي شي ما بيرضيه.
• الباب اللي بيجيك منو ريح، سدو واستريح.
• الهريبة تلتين المراجل.
• القرد بعين أمو غزال.
• الرجال بالبيت رحمة ول كان فحمة.
• رضينا بالبين والبين ما رضي فينا.
• السكافي حافي، والحايك عريان.
• عطي الخباز خبزو ولو أكل نصو.
• الحجر اللي ما بيعجبك بيفجك.
• العز للرز، والبرغل شنق حالو.
• بيخطف الكباية من راس الماعون.
• الله بيطعم الحلاوة للي مالو ضراس.
• لا تنام بين القبور ولا تشوف منامات وحشة.
• إذا بدك تحيرو خيرو.
• غاب القط العب يا فار.
• إذا حبيبك عسل لا تلحسو كلو.
• إذا مات أبوه عالمراتب حطوه، وإذا ماتت أمو على المزابل رموه.
• أعزب دهر ولا أرمل شهر.
• البرغوت قال للبقّة، يضرب الشرشوح إذا ترقى.

أمثال شعبية عن الولد عند أهل الشام

• الولد العاطل بيجيب المسبة لأهلو.
• الولد بدو حيل، وأم ما تنام بالليل.
• أم البنت مسنودة بخيط، وأم الولد مسنودة بحيط.
• تلتين الولد لخالو.
• يا أم الولد لا تكوني بخيلة، مراضاة الولد مو قليلة.
• قلبي على ولدي وقلب ولدي عالحجر.
• المتربي عالخير بيشم إيدو بيشبع، والمتربي عالجوع بمال الدنيا ما بيقنع.
• المصري جواب بتمو والحلبي بكمو والشامي عند أمو.
• الولد ولد ولو صار قاضي بلد.
• لو طلع الولد لخالو بيكبر مقدارو.
• أنا وأخي على ابن عمي، وأنا وابن عمي عالغريب.
• بدعي على ابني وبكره اللي بيقول آمين.
• بكّي ابنك ولا تبكي عليه.
• جوزت ابني لارتاح من بلاه، رجع لعندي وأربعة وراه.

وتبقى الأمثال الشعبية عند أهل الشام من أطرف الأقوال المتوارثة عبر الأجيال، ويرى البعض أن هذه الأمثال لم تأت بمحض الصدفة والعبث بل كانت نابعة عن تجارب حياتية عميقة ودروس صعبة، حتى بات أهل الشام يرددونها لا شعورياً خلال مواقف حياتهم المختلفة، وهي مازالت أفضل تعبير عن الموقف إذ تختصر الكثير من الكلام، كما أنها تشكل مخزوناً للوعي الاجتماعي الذي يتطور بفضل هذه الأمثال والحكم الشعبية التي تقدم نصائح الأجداد للأحفاد. وتمثل مرجعاً للخبرات التي توارثوها في مناطقهم الشعبية وحياتهم المترابطة والمتعاقبة، كما أن هذه الأمثال لها وجه ممتع في العصر الحديث إذ يخلق جواً من الألفة المحببة في الاجتماعات والتندر بالأمثال القديمة وخاصة الأمثال التي تحمل طابعاً فكاهياً.